مش عاوز أبقى ريس

أنا كده كويس :

مش عاوز ابقى ريس ، انا عايش كده كويس ، باشوف الوظايف الخاليه

على مواقع الإعلانات ، ولقيت إعلان غير مدفوع الأجر ( مطلوب رئيس

جمهوريه ) والناس قالتلى روح قدم السيره الذاتيه بتاعتك ( سى فى ) )

رديت وقلت : هوانا مالى ومال الرياسه ، دى شغلانه عاوزه واسطه

مش مهم الشهاده ولا حتى اتعلمت إيه ، المهم يكون قلبك جامد ومفيش

ريحة الضمير ، وتاكل عرق الغلابه الصغير ويا الكبير .

قالولى : الشعب حايعينك وتبقى الراجل الكبير ، وتبقى ليك المشوره

وليك الرأى الأخير ، وليك طياره خاصه ، وكمان يساعدك وزير ، ويوم

ماتحب تهرب ، على طول تروح تطير ، وتاخد معاك مراتك ، وتسرق

أموال كتير ، وتكون حواليك حراسه ، حتى لو ع السرير ، والكل يسمع

كلامك ، قبل الفرار الخطير ،

أنا كده كويس :

رديت وقلت : ياجماعه دامش كلام ، دى وظيفه عاوزه واحد ، فاضى

وآخر تمام ، لايعرف إيه الحلال ، وإيه يعنى الحرام ، ومش مهم شعبه ،

فى نور ولا ف ظلام ، المهم حزب الرياسه ، مايكونش فيه إنقسام .

أنا كده كويس :

مش عاوز ابقى ريس ، اذاى أروح لجمعه ، واشوف عم الشمندى ، واركب

قطر الغلابه ، والعجله اللى عندي ، وقابل كل واحد ، زبال كان أو أفندى ،

مسيحى ولا مسلم ، المهم يبقى جنبى ، ونعيش على طول حبايب ، واللى

عنده يبقى عندى .

أنا كده كويس :

مش عاوز ابقى ريس ، ولا عاوز الوظيفه ، دى شغله بتاعة فضايح ،

دى وظيفه مش نضيفه ، وآخر فضيحه كانت . فى بلد الست لطيفه ،

لما رئيسها يهرب ، دى حكايه مش ظريفه ، الظلم له نهايه ، والشعب

له ميت طريقه ، بياع خضار قالهاله ، أنا حاعملك حريقه ، وكان شهيد

لتونس ، وللشعوب الجريئه .

مش عاوز ابقى ريس ....

رد الكلام على إيهاب فكرى ؟؟؟

اتابع مقالات الكتاب الأفاضل بنهم شديد لعلى استفيد :

مع العلم بأنى أكبرهم عمرا وليس مقاما ، وكل كاتب يدلى بدلوه من

جميل الكلام وعصارة الفكر ، وليسمح لى إخوتى وأبنائى من الأساتذة

الكرام بقليل من الكلام ؟

عنونت مقالى : برد الكلام على إيهاب فكرى ـــ وقصدت من هذا فض الإشتباك

والإلتباك اللغوى والمعرفى لدى إنسان مصرى الهوية ، وتكفيرى المنطق الأسلامى

هو يدعى العلمانية والفكر الليبرالى ، وأخذ طريق بعض الكتاب المنحرفين مثل . على

سالم ، ونوال السعداوى ، وغيرهم ممن يحمل منطق أنا وشارب الخمر رفقاء الدرب .

ولندعوه للتفكر لعل الله يهديه ، ويرجع لعقله ، وهنا أقول :

الشريعة الإسلامية تمثل أعظم الحضارات الإنسانية . لأنها جاءت كافية لمطالب الروح

ومطالب الجسد فلا هى روحانية صرفة معزولة عن الحياة ومتطلباتها لايهمها إلا

تعذيب الجسد ، ولاهى مادية بحتة تغفل مطالب الروح ، وتجعل الإنسان مخلوقا حيوانيا

وآلة صماء لاروح فيها ، وبذلك كانت حضارة وأمة وسطا . وخير الأمور أوسطها .

والفضيلة وسط بين رزيلتين ، وإذا كانت سعادة الإنسان كما قرر الإسلام لاتكتمل إلا

باستكمال الروح والجسد معا وأن الروحية البحتة أو المادية البحتة لاتصلح واحدا

منها سبيلا للسعادة أخذا من واقع الحياة البشرية ، الإسلام يرى أن الروحية المهذبة

أساسا للمادة المهذبة ، ومنها ينبع الروح المهذب للمادة . وبتهذيب الروح تكمن السعادة

للإنسان فى دنياه وآخراه وفى فرده ومجتمعه ، وهنا أقول لإيهاب فكرى ــ كيف يحق

للعلمانية التى تبيح الخمر وعمل الموبقات بحرية الفكر كما تنادى ، وكيف أستمع لك

وأنت تهاجم رموزى بفكرك ، وكيف أقتنع بك والضمير يعود اليك فيما تكتب من فكر

ضال لا يتماشى مع معتقداتى ، المادية العلمانية المهذبة لا تقترب من فكر الآخرين ، ولا

تعتدى بالقول الآثم على الإخوان المسلمين أو على الصحابة الأطهار كاعمر وعثمان

رضوان الله عليهم ، والضمير الحي يدفع بصاحبه إلى مراقى الكمال ، وليس مواخير

الضلال ، ولقد عنى الفكر الإسلامى بتهذيب الروح وطالب به حتى يحفظ للإنسان قلبه

وروحه وجسده ويربطه بخالقه المنعم عليه .

أدعوك إلى التفكر والعودة إلى المنهج السليم ، والإعتذار عما كتبت ولا تدع العزة بالإثم

تدعوك إلى الغرور ، وتكون لك عودة حميدة بين كتاب الموقع ، ولنجعل جميعا موقع

مصراوى نهر من العطاء تتفجر منه ينابيع المعرفة والحكمة من خلال إبداعات كتابه

وفق الله الجميع وأنار بصيرة الضال ..

كلمة طيبة كشجرة طيبة ؟؟

هذه بعض الخواطر والإنطباعات على الحادثة التى وقعت بالأسكندرية

فى الدقائق الأولى من العام الميلادى الجديد :ــ

وقعت الواقعة كما تقع فى كثير من بلدان العالم ، ولكن بدا لى الأمر

وأنه كان لها من ينتظرها ، وأعدوا لها العدة من برامج حوارية وما

تسمى بالتوك شو ، ومواقع على الشبكة العنكوبوتية التى تشابكت

خيوطها الهذيلة الهشة ، ومع بعض الكتاب أصحاب الفكر المترهل

الضعيف من المضللين والمخادعين بخداع لئيم وخبيث ، ومن يسمون

نفسهم بمصطلح العلمانية ، ومنهم من يدعى أنه يحمل الصفة الأسلامية .

هى كلمة واحدة نشعر بها فى مصر فى ماضينا وحاضرنا ، مصر وطن

الجميع لافرق بين مسلم وقبطى ، وما وقع من حادث كريه عافته النفس

المسلمة قبل غيرها ، وأصحاب الدعاوى والفكر العلمانى المقيت لن يبقى

لهم من مكان يبثوا فيه سمومهم ، فالمسلم والقبطى حقيقة على أرض

مصر ، وتحضرنى هنا كلمة الرجل القبطى الشريف " نجيب ساويرس "

حينما قال : من يقترب من مصر لن يجد غير النار .

ويجب أن أقول لهؤلاء : لقد قال الله تعالى فى محكم التنزيل ( ألم تر

كيف ضرب الله مثلا كلمة طيبة كشجرة طيبة أصلها ثابت وفرعها فى

السماء ، تؤتى أكلها كل حين بإذن ربها ، ويضرب الله الأمثال للناس

لعلهم يتذكرون ، ومثل كلمة خبيثة كشجرة خبيثة اجتثت من فوق الأرض مالها

من قرار ، يثبت الله الذين آمنوا بالقول الثابت فى الحياة الدنيا وفى الآخرة ،

ويضل الله الظالمين ويفعل الله ما يشاء )

أى طمأنينة ينشئها هذا التصور ؟ وأى سكينة يفيضها على القلب ؟ وأى ثقة

فى الحق والخير والصلاح ؟ وأى قوة واستعلاء على الحوادث والتطرف المذموم

عقيدتنا غالية علينا ، وحبنا للخير موجود ومتأصل فيها وفينا ، ولا مكان

للإنتهازية العلمانية بيننا ،

وأوجه رسالة إلى من يكتب فى مصراوى بإسم علمانى ، وهو يعرف

نفسه ، لاتدعوا للتنابذ والفرقة بما تكتب وكفاك من ضلال .

وأخيرا لله مرجعنا ومصر موطنا جميعا ..

خواطر ؟ واحد صعيدي شايف البلد

آه يابلدي : ليه يابلد مسختي بجة كل حاجه حلوه فيكي ماسخه ، ناسك يابلد اتغيرت ذي انتي ما تغيرتي ؟ الناس بجت مش ناسك . ماعرفش جايين منين ؟ مش بس ناسك ده حتي زرعك ، وطينك ، ونيلك ، كنا عايشين يابلد وفينا الغني والفجير ، وفينا اللي وجت معاه ووجت ممعهوش ، وكنا عايشين . نصاري ومسلمين ، وكنا نزرع زرعياتنا ونأكلوا بعضينا ، وكانت ريحة الجمح والجيضي ليها طعم تاني ، وكنا ناكل البتاو والمنون وكان طعمه ذي الشهد ، وكانت اللحمه ليها ريحه تشمها لو انت واجف علي محطة الجطر وكانت البهايم عندينا ف كل بيت ، وكانت تاكل من برسيم الغيط ، وكان فينا المتعلم واللي ما تعلمش ومكانش فيه حد يتكبر ع التاني ، وكنا نحترم بعضينا ، دلوجتي راح الاحترام وكان الكبير ليه هيبه . لما يدخل مكان الكل يجوم واجف وما يجعدش الا لما يجعد ، وما مكانش حد يجدر يتكلم إلا لما يكون يعرف إذاي يتكلم ؟ دلوجتي اللي عارف واللي ماعارفش عايتكلم ، وكانت البنات والنسوان عاتختشي . دلوجتي عايشربو الدخان ومين عارف يمكن بياخدوا مضغه ، وكانت شوارعك يابلد زينه مفيهاش اللي عنشوفه دلوجتي ، وكان الجوي يدافع عن الضعيف ؟ دلوجتي الجوي بياكله وينهش ف عضمه ، وعمره اللي كان اللي معاه ماكان يسرج دلوجتي الغني هو اللي عيسرج ، هو الحرامي اللي عيسرج فلوس الغلابه وياخد أرضهم وحلالهم؟ آه يابلدي : لو حبيت اتكلم اتكلم كتير؟ وانا زعلان والله زعلان عليكي وزعلان من ناسك وخايف لا يجي يوم وتبركي ذي البهيمه المرضانه ويدبحوكي : ربنا يسلمك يابلد وتجومي م اللي انتي فيه؟



تنويه : ارجوا قرائة المقال بلغة الجيم المعطفه.
الجيضي " هو عيش الذره "
والمنون " فضلة عمل المسلي "
والجمح "من القمح "

المعزه ؟ غلبت : يا رجاله

الكل شاهد المنتخب : ما يسويش إنه يكون في المركز الأخير مش في التاسع والله فضايح
جابولنا معزه خوفتنا والنيجر دخلت التاريخ : المعزه دي حا تبقي مشهوره شهرة الأخطبوط الألماني . وفضيحتنا بقت بجلاجل ( معزة النيجر غلبت يارجاله ) منتخب جاب بطولات يشكر عليها ، لكن عمره الأفتراضي انته ، وكمان الناس اللي في إتحاد الكوره كفايه عليهم اللي خدوه ، ولا هيه وسيه ، واللي بيقعد علي الكرسي مش عاوز يسيبه . ذي الجماعه إياهم يا ناس عيب ، واختشوا بقي ، وحرام حرق في اعصاب الناس ، وإحنا لازم نعرف إن : النادي الأهلي طالما وحش يبقي المنتخب وحش ، وكمان العواجيز دول كفايه عليهم كده ، وأعوا حد يقول ياما إدونا وفرحونا ؟ أخدوا التمن وزياده ، وكمان ياريت يحصل التغيير إبتداء من الرياسه وانت نازل .لحد الحال ماينصلح ، وكفايه علينا زعلنا من الطماطم ومن الخضار ومن غلوالأسعار كمان حاتيجي معزه تزعلنا ، والا النهارده معزة زعلتنا بكره يجيلنا تيس ، وبعد منه خروف
الرياضه عندنا عاوزه شوية نضافه مش كده ولا إيه !.....

حكايه ؟ لكل حاكم ، وموعظة للي ما يعرفش

كنت اقرأ كتاب قيم وجدت فيه الحكايه دي : قلت أكتبها يمكن لعل وعسي توصل ؟ ومين عارف مش يمكن توصل : الحكاية . إن سيدنا عمر ابن الخطاب رضوان الله عليه ، كان حب يوسع مسجد رسول الله " صلي الله عليه وسلم " وكان يعرف أن الرسول كان عاوز يوسعه ولكن وافته المنية ، وكان بيت العباس قريب من المسجد . فذهب إلي العباس وطلبها : منه علي أن يعطيه أرض أوسع وأحسن : فقال له العباس لاأفعل " عجيب !! فقال عمر إذا لأعليك عليها " يعني أطردك منها " أنا صاحب سلطة فنصدر أمر إستملاك ، فأجابه العباس : ليس ذلك لك . فاجعل بيني وبينك من يقضي بالحق . فقال عمر من تختار ؟ فقال العباس : حذيفة ابن اليمان ، وبدلا من إستدعاء حذيفة انتقلا إليه لأن القضاء لايستدعي ، ولاكن يدعي إليه ، وقصا عليه الخلاف .. فقال حذيفة : سمعت أن نبي الله داود أراد أن يأخذ بيت لغلام فطلبه منه فأبي فأراد داود أن يأخذه قسرا فأوحي الله إليه أن أنزه البيوت عن الظلم هو بيتي فعدل داود ، وتركه لصاحبه . فنظر العباس إلي عمر وقال ألا تزال تريد أن تغلبني علي ذلك ؟ فقال عمر لا والله . فقال العباس ومع هذا فقد أعطيتك لكي تذيدها في مسجد رسول الله .. فياليت حكامنا في المحافظات أن تعي أحوال الناس ولا يكون التعسف في القرارات الأدارية سمة من سماتهم ..

وهذه موعظة اخري لهذا الصحابي الجليل

قابل سيدنا عمر ابو حذيفة وقال : كيف أصبحت يا أبا حذيفه فقال : أصبحت أكره الحق ، وأحب الفتنة ، وأصلي بغير وضوء ، ولي في الأرض ماليس لله في الأرض ولا في السماء فاغضب عمر وقال : لقد ضل ابا حذيفة ، وذهب إلي سيدنا علي ، وقال له لقد ضل ابو حذيفة قال له علي لماذا ؟ وقص عليه عمر ماقال : فقال علي : لقد صدق فيما قال ! لقد قال يكره الحق ، والموت حق ، وقال يحب الفتنة ، وقد صدق المال والبنون وقد قال الله ( إنما أموالكم وأولادكم فتنة ) ويصلي بغير وضوء . يصلي علي النبي ، وله في الأرض ماليس لله ، فقد صدق له زوجة واولد ......

رد علي مقال : رغم أنف الرئيس ؟؟؟

قرأت في جريدة : الشرق الأوسط مقالة بعنوان ( رغم أنف الرئيس ) وأسردها عليكم ؟
ولكم الحكم فيما يكتبون كتاب مصر ؟ هل يكتبون صدقا . أم يكتبون شهرة . أو يكتبون
تدليسا وافتراء وكذب .. كاتب المقال : يقال أنه كاتب كبير فله من المؤلفات الكثير والكثير ، منها ماهو مسلي ومنها الأدبي ، ومنها الفلسفي ، وله عامود في جريدة الأهرام بعنوان ـ مواقف ـ ودعونا نقف عند مقالنا هذا : يقول : أنه أراد أن يتزوج بنت حسب ونسب ، فخالها وزير وخالها التوأم وزير الشئون الأجتماعية .. ورفض الزواج "جمال عبد الناصر" وقال : "كيف يجرؤ واحد من أخبار اليوم أن يتزوج واحده خالها من الضباط الأحرار ؟" وخالها قال لها : سوف أبحث في سجل العريس ، وإن وجدته يعرف امرأة واحدة فلن يتركها بعد الزواج ، وإن كان يعرف الكثيرات فسوف أوافق علي زواجه فورا ، وفي الصباح قال لها : تزوجيه ده بيعرف ما شاء الله من الجنسيات علي كوكب الأرض ..بريطانية ،وفرنسية ، وأمريكية ، وأستراليا ، حتي الأسرائيليه ،وفي ذلك الوقت فصله الرئيس سنتين ، وبعد ذلك عاد إلي عمله ، وتزوج رغم أنف الرئيس .. طبعا عرفتم من هذا الرجل إنه (أنيس منصور ) واستفذني هذا التهريج في ما يكتب ، وبحثت عن سيرة أنيس منصور ، وجدت فيها من الكثير ما هو غائب عن كثير من الناس . وإليكم القليل مما وجدت فما وجدته كثير؟ أنيس منصور كانت بدايته مع أخبار اليوم ثم مالبث أن تركها وتوجه إلي الأهرام في 1950 حتي عام 52 ثم سافر وكامل الشناوي إلي أوربا ثم رجع ، وعمل مدرسا للفلسة الحديثة بكلية آداب عين شمس من عام 54 حتي عام 63 ، وأعطاه "جمال عبد الناصر" جائزة الدولة التشجيعية في الآداب عام 1963 وكان يكتب أيضا في الصحافة ؟؟؟ ولنبدأ في تكذيب ما قال ؟ هل يعقل أن رئيس دولة يتدخل فيما لايعنيه ؟ هل رئيس الدولة في هذا الوقت عنده من الوقت أن يشتغل خاطبه أو له حق القبول والرفض ؟ هل كان يعين مدرس في الجامعه ؟ هل يعطيه جائزة الدولة ؟ هل يكون مقربا من السادات وصديقه والرئيس غضبان عليه ؟ لماذا بعدما مات عبد الناصر وأربعون عام من رحيله تكتب المقالة وفي ذكري وفاته ؟ أليس أنيس منصور صديقا لأريل شارون والسفير الأسرائيلي ؟ أليس أنيس منصور صديقا لسيجال جورجي الأسرائيليه وعملت عنه رسالة الدكتوراه ؟ أعتقد أن أنيس منصور قد أصابه الزهايمر وقد بلغ من العمر 86 عاما لقد حاول الأنتحار مرتين باعترافه : كفي من الكلام الذي لا ينطلي علي عقولنا ولا تحاول أن تبث السموم وليترك كل صاحب قلم مسموم هذا الرجل الذي سيظل في ذكرانا فجمال عبد الناصر رمز مصر الطاهر بحسناته وسيئاته .......

إعطيني فتاة ؟ صينية : أعطيك حبا وحنانا..

بلدنا بلد جميله : والحكمة فيها قليله ، تشوف بناتها تقول : بلا قرف جتكوا نيله ؟
من حلاوة بلدنا ، وجدعان بلدنا .. إنهم بيعرفوا كل حاجه ، ومفيش حاجه ما بيقدروش
عليها ؟ تكلم الواحد يقولك : إحنا اللي ضربنا الهوا دوكوا وعبناه في أزايز ، واحنا اللي
خرمنا التعريفه .. شباب ذي الفل .. حا يضيع والسبب الحكومه فتحت أبواب البلد وكتبت عليه ( أدخلوا مصر إن شاء الله متمتعين ) معلش اقصد آمنين ، لكن صحيح كلامي اللي بين القوسين . . الموضوع والظاهره اللي حاتكلم فيها هيه مش قضية دعاره ولا قضية عيني عينك وعلي قفا مين يشيل .. القضيه حكاية شباب حايضيع ، وليه حايضيع . أقول أنا ورزقي علي الله يمكن حد يسمع ويلحق يلم الدور .. الجماعه بتوع الصين جماعه أذكياء بدرجه عاليه ؟ دخلوا علينا بالحنجل والمنجل ، وبدأو يبعتولنا شوية حاجات من اللي بتزغلل العنين ؟ إشي قمصان نوم من كل لون ، وعلب ماكياج ، وبرفنات وملابس جميله ، ودخلوا من الباب المفتوح ، ونسونا فرحت وزقطط ؟ ده كله ببلاش كده .. والحكومه فرحانه سايبه الشعب يتلهي ، وشويه شويه حكومة الصين بدأت تبعت في نسونها وبنتها ، وبدأ رن الجرس علي البيبان ، تفتح الباب تلاقي بنت حلوه عنيها ذي عين البساريا وشعر طويل ومعاها شنطه ، وشنطة حمزه أول ما يطلع منها المايوه أبو حتتين ( البكيني ) وخد عندك ، وهيه قاعده مع الماما .. ترمي الصناره الصيني علي الراجل أو الولد ، حبيبي يالله نتجوز ؟ وببلاش كده لا دافع أبيض ولا أسود ، ولا أنت حاتجيب شبكه إيه ، والعفش عليك ولا عليه ، والمغلوب علي أمره مش عارف المصيبه السوده .. ما يعرفش إنه بقي فيه إحتلال في بلدنا لنسوان الصين .. بينزلوا مجاميع مع بعض وعلي الأحياء الشعبية ويأجروا غرفه ولا غرفتين ، في كل المحافظات حتي الصعيد المهم ما ترجعش تاني .. عددهم كتر ياولداه ومفيش مكان ليهم ، ومصر أحسن مكان ، وشبابها ورجالتها أحسن من شباب الصين القصيرين ، وأهي البنت الصينيه عايزه تتستت وتاكل عيش وتعيش وتلاقي بعل يكون بعلولها ويعرف إذاي يمتعها .. وبنات بلدنا تعنس وكفايه عليهم الفرجه علي فانوس كورومبوا ..والحكومه بتعتنا تزغرط ؟ لأن معندهاش حد يرصد الظواهر في المجتمع .. ولا عندها خبر عن رجال الإجتماع علشان يشوفوا حل ، ولا تقدر تغير اليافطه بتاعة المطار أدلوا مصر إن شاء الله متمتعين ، وعقبال عندكم قابلونا عند المأذون العرفي مش كده ولا إيه !......

التانيه ، ولا ؟ الزانيه ؟؟؟

ربنا يجعل كلامي خفيف عليهم : وملاقيش اللي بيرفعوا شعارات ؟ حقوق المرأه ، هاجمين عليه من كل حدب وصوب ، ويقولوا عليه الخاين السلفي الرجعي ــ إذاي يقول الكلام ده ، مين عارف يمكن يطالبوا ليا بالشنق في ميدان عام ؟؟ المهم ندخل في الموضوع ، ولو حبيت تسأل أي راجل تقوله إيه رأيك تتجوز تاني ؟ علي طول يقولك .. ياعم هو أنا قادر علي واحده لما تاني ، ولكن بتصادف إنه فيه واحد بيتجوز علي مراته مره تانيه ، ولو سألته ليه ؟ يقولك والله أنا ما تجوزتش بجد غير تلات شهور ،وبعدين مابين من سبعه ، وتسع شهور فرحان ؟ مابين وانا باشوف الإنتاج بتاعي بيظهر لحد ما تروح المستشفي علشان نجيب المحروس أو المحروسه ، وممكن يكونوا أكتر حسب مشيئة ربنا ، ودول يشرفوا وعينك ما تشوف إلا النور : أشوفك انت ولا أشوف ولادك ؟ ياستي منا برضه عاوز اللي يشوفني ؟ ولا انت هنا ! والواحد بقي عامل ذي " الإرد ابو صديري " لحد ما تيجي واحده تانيه من بنات جنسها تزغلل عنيه " أعمل إيه انا بقي ! المهم إن السبب في المشكله الأنثي واللي أخدها عليها برضه أنثي . يعني همه اللي عملوا المشكله وتيجي علي راس الراجل ، وقالوا عاوزين يعملوا قانون إن الواحد لما يحب يتجوز تاني يرفع قضيه بالموافقه .. وبلاش من تشريع السماء ، ونمشي ورا قانون النساء ؟ والله حاجه تحير . همه لا عاوزين يرحموا ولا يخلوا رحمة ربنا تنزل . دا الجواز التاني للقادر رحمه بيصون اختك يا بنت حوا ، وشوفوا عدد الأناث بقي قد إيه من غير جواز وعنسو .. وبعدين التانيه ، ولاالزانيه إيه رأيك . مش كده ولا إيه !....

بيني وبينك ياريس ؟ عملت معاك حوار كويس !

قمت من النوم مفزوع وقلت : خير اللهم اجعله خير ، وقال إيه ؟ قال أني قابلت الريس ، وكنت قاعد معاه في نفس المكان اللي كان فيه الوزير الفنان ، والفنانيين ، وبعد السلامات والتحيات . الريس سئلني ؟ عن أحوالي والعيشه والمعيشه وعامل إيه في شغلك ؟ قلتله ياريس أنا ما بشتغلش لأنه مفيش شغل : الريس الله يخليه نده علي الجماعه اللي بيشتغلوا معاه وقالهم أذاي ما بيشتغلش ؟ المهم الريس سألني إيه أخبار جيرانك ؟ قول وما تخافش . قلتله : والله ياريس الحاله ضنك متسرش عدو ولا حبيب قالي يعني إيه اتكلم وقول اللي عندك : قلت ياريس الجماعه الأغنيا اللي جنبنا أخدوا الأرض الفاضيه واستولوا عليها ، ومسبوش لينا حاجه ، وكمان اولادنا مش عارفه تتعلم ، وكمان الصحه تعبانه ، ووزارة الصحه مش شايفه صحتنا ، وكمان ياريس الأسعار بقت مولعه نار حتي الطماطم بنقف عليها طابور ياريس . ولا الرشوه والفساد يا ريس بقت للركب ، وياريس أنا خايف بعد ما اطلع من عندك الجماعه إياهم يعملوا فيا حاجه .. بيني وبينكم الريس قالي ماتخفش انت قاعد معايا ؟ طيب شايف إيه .. دا الريس اللي بيقول : قلتله والله أناشايف ياريس إن حضرتك الأول تنضف البلد من الفساد ؟ قالي إذاي ، قلتله : سيادتك تنزل أمر يعملوا غوايش حديد وكل واحده ليها لون معين ؟ يعني اللي بياخد رشوه يلبس غويشه بني ، ولما الناس تشوفه بإيده تعرف أنه مرتشي ، واللي بيسرق الأراضي ، والحراميه اللي بينهبوا الشعب .. كل واحد ليه غويشه معينه ، ولما الناس تشوفها تعرف ده عمل إيه . وده بدل الأقتراح الروسي اللي بيقول يحطوا ختم ذي الوشم ..وقعدت أربع ساعات ذي الفنانين وحكيت كل حاجه ، ويخساره لقيت الريس عنده خبر بكل حاجه حاصله في البلد : بس هو كان قاعد معايه كده يعني جبران خاطر لأنه لما قعد مع الفنانين ؟ أنا نمت وأنا بافكر هما قالوا إيه وقال ليهم إيه ! وكل حلم وأنتم بخير ، واللي يحلم أحسن من اللي مابيحلمش . مش كده ولا إيه !....

الطلاق مرتان ؟ وإلا .......

موضوع اليوم اللي حا تكلم يمكن يكون ناسه واهله . يعني المتخصصين من أهل العلم والمعرفة في امور الزواج والطلاق : أفضل مني يتكلموا فيه . لكن انا حاتكلم من ناحية إني تلمست بعض بعض حالات الطلاق وشاهدة ما يجري فيها واسبابها ، والناس بتحاول تتحايل علي الدين ، وبتكون هيه السبب في خراب البيوت .. طبعا الكل عارف إن كلمة
( علي الطلاق ) دي كلمه سهله وبسيطه عند كتير من الرجال ، وكمان عند الستات لو شايفه نفسها شويه علي طول تقول لجوزها (لو راجل طلقني ) ومن المفارقات الغريبه . انه لو رمي عليها يمين الطلاق وقالها ( روحي وانتي طالق ) تجلها
ذي صدمه وحالة ذهول وتسأل نفسها . إذاي اتجرأ وقالها ، ويبقي يوم اسود في حياتها وحياة اهلها : واتحتط في خانة
( المطلقات ) نفس الشيء مع الراجل بعد ما يحصل اللي حصل ؟ يسأل نفسه انا إيه اللي نيلته ده ، ويكون الندم ! والكل
يحاول يشوفله مخرج ، ويسألوا الشيوخ والفتاوي تظهر ، وكل واحد يقول فتواه والفتاوي كتير . لاكن انا وقفت عند فتوة
المحلل ؟ سألت إيه هوا المحلل ؟ قلوا لازم تتجوز واحد تاني لأنه حلف اليمين التالت . وهنا يكون التحايل علي الدين : ولاكن حصل قدام مني موضوع عن المحلل فيه من الطرافه الكثير وهوا ده اللي خلاني اكتب الموضع : في المنطقه اللي انا ساكن فيها راجل شكله محترم كان متجوز واحده ست . حلوه وشايفه نفسها وكان ربنا مديها الجمال والدلال وكان عندهم ولد وبنت . جه في يوم جوزها رمي عليها يمين الطلاق ، وكان بيحبها طيب يعمل إيه . قالوله لازم من المحلل
رد وقال طيب الاقيه فين ده ؟ بعدين أجيب واحد ما يرضاش يطلق . واحد قال السيد العبيط ما يعرفش حاجه نديله شوية فلوس وأه ليله وتعدي . السيد العبيط كان كان اسمه أبو رياله لأنه كان بيريل علي هدومه ومن شدة الرياله كأنه لابس جاكت شمواه . المهم السيد ما كانش له في النسوان بطبيعة الحال يعني لسه بكر . كتبوا الكتاب وياسيد انت تنام هنا : الست باليل شافت السيد نايم لعب في مخها إبليس . قامت صحت ابو رياله من النوم وفي الحمام نظفته وخلته آخر تمام
ودخل عليها ابو رياله وكانت ليله .. شافت فحولة ابو رياله لأنه ما يعرفش حاجه غير الفطره بتاعة الحيوان وكان ؟ لاجوزها ولا جواز كل الستات يقدروا يعملوا اللي عمله ابو رياله : جه جوزها السابق وجاب المأذون علشان يطلق

ورفض ابو رياله يطلق لأنه لقي حاجه ببلاش وهيه فضلت معاه لحد ما اخدت كفايتها منه وبعدين خصل الطلاق علشان الأولاد : المهم لازم الناس تخلي بالها ولازم تعرف إن الطلاق مرتان والتالته الكل خسران..

اللي اختاشوا ماتوا

يقولون أن للإعلام هدف : والأعلام المرئي المسموع من أخطر أدوات تغذية الفكر والشعور الوجداني لدي العامه والبسطاء من الناس " جاء شهر رمضان الكريم وانقضي .. وشاهد من شاهد من مسلسلات ألإعلانات ،ولا أستطيع أن أستوعب هذا الكم من الفوضي المسلسلاتيه من أعمال المشخصاتيه إذا جاز التعبير أن نطلق عليهم ذلك .. ولكن دعونا نتوقف قليلا .. كم من عمل جيد يجب أن نشاهده إذا أردنا أن نستفيد " ودعونا نرجع الي موضوعنا .. أخذت أدوات الإعلام من برامج ليس لها عنوان دعوة ابطال المسلسلات لإلقاء الضوء علي ما أنجزوا من أعمال .. واستوقفني برنامج القاهره اليوم من دعوة ابطال مسلسل الحاجه زهره.. وسأل مقدم البرنامج بطلة المسلسل إيه رأيك في الرجال ؟ وكان الرد كدابين وخاينين وغيره من الكلمات الرديئه المنطق .. وما هذا اللغط الذي يقدمه عمرو أديب يحضر واحده لا تفهم في أصول الكلام ترد علي مشاهده انتي ليه بتتفرجي عليه .. ألا يقولون بأن الفنان شخصيه عامه ..يجب أن يحترم الفنان العامه .. وما هذا الذي ترسمه علي ذراعيها يجب أن ينتقي ألإعلام ما يقدم ويجب أن يكون مصلح للذوق العام ....

جياع لا تأكل اللحم

إستوقفني خبر مقابلة السيد الرئيس لبعض الفنانين : بمناسبة عيد الفن . طبعا شيء عادي إن رئيس الدولة يستقبل فنانيها ؟ لاكن اللي لفت نظري إنه قعد معاهم ( أربع ساعات ) حسيت بيني وبين نفسي إنها مقابلة فيها الكثير
من الحوار والنقاش في امور تهم البلد ، ولاكني لما تابعت الموضوع من لقائات الفنانين في البرامج التلفزيونه إنهم ماتكلموش في حاجه من ذلك ، المهم انهم قالوا لسيادة الريس مشاكلهم ، وبعدين قلت سئلت نفسي ؟ ليه الريس ما قعدش
ساعه مع اطباء مصر ، وساعه مع مهندسين مصر ، وساعه مع محاميين مصر ، وساعه مع عمال مصر : تبقي اربع ساعات برضه مش كده ولا إيه . بس الموضوع اللي خلاني اكتب المقاله غير كده . لأني لما شفت الفنان عزت العلايلي
في المقابله إفتكرت فيلم ( ذئاب لا تأكل اللحم ) اللي مثله في السبعينات في الكويت مع ناهد شريف ، قلت الريس معندهوش خبر إن كيلو الحمه بقي بسبعين جنيه . يبقي الشعب مش حاياكل اللحمه ؟ طيب مين اللي حياكل . طبعا مش احنا ، وكمان فيه حاجه تانيه . نشوف باقي الأسعار اللي بقت مولعه نار . الباميه بستة جنيهات ، والطماطم ، والفاصوليا
بعشره وغيره .. بلاش ياريس من الفن اللي مش وقته لأنه مش حيأكل الغلابه . ياريس شوف التعليم وأخباره ، وشوف الغلبان ، وأعذاره . الشعب بتاعك صبور قوي . ومش طماع هوا عا وز بس يكون مستور . لما الفقير بيعدي علي مطعم حاتي . بيهاتي . الناس بتاكل في بعضها . الكل ماشي في الشارع شايل طجين سته . انا مش باقول نقد ولا حاجه
انا باكلم نفسي المحتاجه . انا حاكره الفن وانا جعان . ويوم مالاقي كيلو لحمه واكل عيالي حاشوف الفن والفنانين . طبعا دوشت دماغكم . بس احب اقول ان فيلم . ذئاب لاتأكل اللحم بيتكلم عن الطبقه المخملية اللي كانت عايشه في الكويت في السبعينات . وعن لحم البني ادمين ( الستات ) واعتقد إن الطبقه المخمليه عايشه في وسطنا دلوقت وربنا يكفينا شر المستخبي ...

شكرا مني الشاذلي

الكلام الصادق له عنوان . ولذلك بدأت بعنوان : شكرا. مني الشاذلي ، وشكرا قناة دريم ، وشكرا لمعدين برنامج العاشرة مساء .. في حلقة يوم السبت 25 / 9 كان موضوع الحلقة عن ذكري وفاة الزعيم الخالد (جمال عبد الناصر ) ولي الحق في أن أقول أن هذه الحلقة يجب أن تكون وثيقة أرشيفية للبرامج الحوارية التاريخية . لقد عادت بي مني الشاذلي إلي الماضي الجميل بحلوه ومره . لقد سالت دموعي وأنا أشاهد بعض اللقطات من تاريخ مصر الذي تم تغييبه ومحاولة طيه في بوادي النسيان بفعل عوامل حقد ألأنسان ؟ ولاكن لن يستطيع من كان أن يطمث حقبة من تاريخ مصر لا . بل حقبة من تاريخ ألأمة العربية . لقد شاهد من شاهد وعاصر من عاصر هذه الحقبة من التاريخ في صحوة الضمير العربي في وقت كان فيه الأستعمار يسيطر ويهيمن علي غالبية شعوب المنطقة . وكانت ولادة ثورة بقيادة هذا البطل . فرد كواحد من عامة الشعب بقيادة هذا الشعب .. يجب علي الأجيال الذي لم تعاصر تاريخ الثورة أن تعرف تاريخ قادتها وإنجازتهم ومن هم ، وما لهم ، وما عليهم . نتمني أن تعود كرامة المصري إلي ما كانت عليه أيام ( جمال عبد الناصر ) ومرة اخري شكرا الإعلامية القديرة مني الشاذلي..

قال عشان بيحبوه .. هاينتخبوه

سياسات لجنة السياسات بالحزب الوطني بتلعب مع الشعب لعبة خد وهات : طبعا كلنا عارفين بقالهم مده في المجمع الأنتخابي للحزب بيختارو المرشحين بتوعهم علي الدوائر ألأنتخابيه ومش مهم المرشح يكون من الدايره ولا لأ المهم يشوفو مين اللي يكون له تقل انتخابي : يعني زي ما أعلنوا إن عبد السلام محجوب حاينزل في دائرة الرمل اسكندريه قدام مرشح الأخوان المسلمين لأن شعب اسكندريه بيحب عبد السلام محجوب . لحد هنا ومفيش مشاكل ، ولكن لما شعب اسكندريه بيحب الراجل ليه مشتوه وشلتوه وخلتوه وزير الأداره المحليه . الراجل كان شغال كويس في البلد وعمل تطوير كتير لحد الناس ماحبته وجبتم غيره الناس كرهته وبعدين واحد بقي وزير حايخدم الناس إذاي ويشوف إحتياجتها .. طيب شلتم دايرة مصطفي بكري برضه علشان يبقي قدام وزير الأنتاج الحربي لاكن مصطفي بكري صمم ينزل قدام منه وطبعا مش معقول وزير يسقط في الأنتخابات ده يبقي عيب .. إحنا كلنا عارفين إن اللي انتم عاوزين تعملوه حاتعملوه بس ياريت يكون برضا الناس مش با لإكراه . لأن لجنة السياسات زودة الموضوع في ألأختيارات علي حساب إرادة الشعب . والحزب الوطني ولجنته عملوا ! ذي إتنين قرع قابلوا بعض واحد قال لزميله ما تيجي بينا نروح وادي القرعان نزرع ونقلع وإيش ما يطلع يطلع . بس علي شرط . النص ليه ، والربع ليه ، والثمن ليه ، والثمن الثاني ليه وليك ! الحزب عاوز ياخد البرلمان كله والباقي للشعب هيه تبقي فين السياسه!!!

دود المش

كتير مننا بيحب ما يطلق عليه الجبنه القد يمه ( المش ) بس الأكله الشعبيه دي إذا جاز لنا أن نطلق عليها الصنف الرئيسي لمائدة الفقراء : أصبحت من مشهيات مائدة الأغنياء . وهي البديل الرئيسي ( للكفيار ) بالنسبه لأهل الريف
وبالذات في محافظات الصعيد . ويتفننون في صناعتها وكل ما طال عمرها كانت أحسن وأطعم وأهل الصعيد يتبارون
في الكلام عنها . فتجد الواحد منهم يقول للآخر انا عندي جبنه بقالها سنه والآخر يقول انا عندي خزين سنتين . يعني
بتلاقي الجماعه إياهم بيتباروا علي النبيذ ويقول انا عندي نبيذ معتق . بس الفقراء مش حايوصلوا للنبيذ : مش مهم
المهم ان الكل أكل ( المش ) وعشان المش افتكرت المثل اللي بيقول (( دود المش منه فيه )) والأغنياء ، والفقراء
اتفقوا علي المش .. خلونا نحط الموضوع جنب بعضه . الشعب منه الحكومه ومجلس الشوري و مجلس الأمه (الشعب)والوزراء ومنه رجال الأعمال ومنه العامل ومنه الفلاح ، والفران وغيره وكل مهنه موجوده من الشعب والكل بياكل في بعضه وعايش مع بعضه . ذي دود المش منه فيه . حاجه واحده بس لسه مجلهاش الدود وربنا يحفظها لينا لأنها هيه الدرع الواقي ( قواتنا المسلحه) هيه اللي لسه بعيد ه عن الدود وعن الوطن بتزود . وياريت ناكل المش من
غير مناكل في بعضنا ...

سيدي العريان ومظاهرة العميان

بداية كنت اشاهد فيلم "أمير الظلام" لعادل إمام : واستوقفني مشهد المظاهره التي كان يقودها عادل امام ومعه العميان ؟ وقابلهم واحد ومعاه مراته وقالها غطي وشك ياوليه . وسألهم ؟ انتوا رايحين فين . قا لوا رايحين لسيدي
العريان . وقلع هدومه ومشي معاهم . المهم يمكن كتير مايعرفش . إنه صحيح فيه شيخ اسمه : ابراهيم العريان ..
الشيخ العريان ؟ كما قال . الشعراني . في كتابه الطبقات الكبري . كان بيطلع علي المنبر ويخطب عريانا . وكان إذا
جلس بجوار أحد الكبراء ( ضرط ) وقال هذه . ضرطة فلان ، ومات سنة تسعمائة وثلاثون تقريبا . قعدت أفكر إيه
اللي عاوز يقوله مخرج الفيلم من المشهد ده بالذات ؟ هل عاوز يضحك الناس وخلاص ، ولا عاوز الناس تبعد عن
الجماعه ( الصوفيه ) ولا عاوز يقول حاجه ثانيه . اللي انا شايفه . إنه بيقول لينا . أنتو مش فاهمين حاجه وخليكوا
وراء الحزب اللي استهويتم إنه تمشوا وراه . حتي لو كنتوا عريانين ، ولا عميان . المهم أي حد راكب حصان بيمثل
السلطه بنجروا وراه . من غير مانفكرو؟ مين هوا سيدي العريان ؟ قبل ما نمشي وراء أي حد . لازم نعرف مين هو
ونشوف مصلحة البلد ، ونبطل بقي كلمة . ش الله ياسيدي العريان أنت في ألأنتخابات كسبان .....

بيت النتاش مايعلاش

بيت النتاش ما يعلاش : مثل لقيته ماشي مع اللي بيحصل في البلد . كلنا عمالين ننتش

في البلد ، واللي مش عارف ينتش بيتقال عليه اهبل وعبيط . والكل بيحلل الحرام ؟ عسكري

المرور بينتش من السواقين والسواقين بتنتش في الركاب ، والنواب في مجلس الشعب بتنتش

في وزارة الصحة ، ووزارة بتنتش في المرضي ، ورجال الأعمال بينتشوا في اراضي البلد

والمسؤلين بتنتش فيهم ، ووزارة التربيه والتعليم بتنتش في المدرسين ، والمدرسين بتنتش

في أولياء الأمور .. يعني كله عمال بينتش في بعضه ولو حبيت احكي واتكلم علي النتاشين

مش حا خلص كلام .. كفايه بقي نتش في البلد . والنتش فيه أنواع ؟ فيه نتش سرقه وفيه نتش

كلام . يعني في الرياضه فيه نتش كلام وسرقه وبيقولوا عليها رياضه . طب أذاي . والصحافه

برضه فيها نتش كلام وسرقه .. إذاي بلدنا تعلي ونبقي كويسين وفيها كل النتاشين . وبرضه

فيها الأوسمه والنياشين طيب إذاي ! ...

الزوجة النكدية والحكومة الذكية

استوقفتني المشاكل الزوجية : واخذت أتابع عن قرب لهذه الأحداث ، وجدت تشابه كبير بين الزوجه والحكومة : الست في بيتها هيه اللي بتدير شئون الأسره ؟ يعني ماسكه وزارة الداخليه والخارجيه ، والماليه و كل ما هو يقع تحت طائلة قانون الطواريء المنزلي . أما الرجل طبعا ماسك وزارة الأشغال العامه ، و وزارة الدفاع .. ومن هنا جت السلطة الأنثويه في العكننه المنزليه ، وممكن تنكد على جوزها في أي وقت بسبب أو من غير سبب . هو كده تنكد عليه ، وعلي العيال ؟ الولد مش راضي ياكل إلا شيبسي البنت عاوزه تروح النادي . انا عاوزه تشد حيلك وتشوفلك شغلانه تانيه علشان المصاريف مش مكفيه . الراجل يبقي لسه راجع من الشغل تعبان وقرفان من زحمة الطريق والمواصلات . ودي تقابله بموشح مش علي الخاطر والبال . المهم مننساش إنه فيه ستات أمرات ذي الشربات . بس مش ذي الجريئه إيناس وأمثالها .. دول حاجه تانيه.. لكن وجه الشبه بين الزوجه النكديه ، والحكومه الذكيه موجود . موجود في القرارات العكسيه اللي الحكومه بتاخدها . ممنوع طباعة الكتب المدرسيه . وبعدين رجع طباعة الكتب . طيب ليه تكلفوا الناس وتعطلوها ، الغي عقد مدينتي ورجع مدينتي . يعني مشاكل كتير تنطبق علي مشاكل الحياه الزوجيه مع الزوجه النكديه ما تقولش إنهم متفقين مع بعض يخلوا حياة الناس نكد في نكد . هو الواحد حا يلاقيها من مراته ولا من الحكومه ، ليه الأتنين دول ما يخلوش الحياه . فله شمعه منوره : علي رأي صاحبنا اللي شالته الحكومه الذكيه . وهو اللي كان بيكشف بعض الحاجات المتغطيه . وبعد منه شالوا واحد كان لسانه طويل شويه؟ وربنا يستر من الأخبار اللي جايه !......

طفاسة

يا ناس يا هوووو الشعب جعان إلحقوه .. جاتني الست حرمنا المصون وقالتلي يالله بينا نروح كارفور علشان نجيب لوازم الشهر الكريم ..
المسافه مابينا وبين كارفور حوالي نص ساعه .. اخدناها في ساعه ونص .. دخلنا كارفور بعد عناء طويل علشان نلاقي مكان نركن العربيه .. المهم .. دخلنا الهيبر وعينك ما تشوف إلا النور .. يوم الحشر العظيم .. الناس عماله بتتسابق علي كل حاجه ؟ وقفت اتفرج واسأل نفسي همه بيقولو البلد مفيهاش فلوس .. أومال إيه اللي بيحصل ده .. إيه اللي انا شايفه ده .. كل واحد ماسك عربيه في إيده وعمال يرمي فيها اللي عاوزه واللي مش عاوزه .. الأسعار مولعه نار وبرضه الناس بتشتري ؟؟ هو فيه إيه هي آخر أكله ولا إيه ، ولا هي لزوم الفشخره ( دي حاجه آخر مسخره ) هو المحلات والبقالات والأسواق هاتقفل في رمضان ؟ دي حاله آخر جنان .. كل المواد الغذائيه دي هتتاكل وتنزل في البطون ، وبعدين في المجاري ، وبعدين يطلعوا مية المجاري ويزقوا بيها الخضار والفواكه ونرجع ناكلها تاني .. وعلي رأي المثل .. " دود المش منه فيه " .. نرجع لحرمنا المصون .. قلتلها والله مانا شاري حاجه خليني أنا الوحيد في هذا الجمع المديد اللي أرجع البيت تاني زي ماجيت .. يا ناس عيب ما تخلوش بطونكم تزلكم . الشهر ده شهر عباده مش شهر ملي بطون وطفاسة ..

رد على فؤاد الهاشم

قرأت في جريدة الوطن الكويتية مقالة بعنوان المخابيل زادوا مخبولا.. للمدعو "فؤاد الهاشم" .. وكتب في مقالته الحمقاء .. أن العرب انساقوا وراء "جمال عبد الناصر" .. وكانوا ينصتون إلي خطبه وصوته ولم يفعل شيء مع إسرائيل .. وذكر "عبد الكريم قاسم" ، و"صدام" ،وغيره من القاده السابقين .. الذين أصبحوا في ذمة الله .. ودائما أجد في كتابته السخريه من رجال الدين ، ودائما ما ينقد كل ما هو طيب وجميل في حياة العرب من الماضي .. أما في الحاضر فيكتب كلام جميل عن الراقصه دينا وعن غيرها من النساء الكاسيات العاريات .. كلام طيب .. أين أنت من "جمال عبد الناصر" حتي تكتب عنه .. أليس "جمال عبد الناصر" هو من أوقف "عبد الكريم قاسم" من غزو الكويت؟؟!! ..
أليست صورة "جمال عبد الناصر" مازالت تزين جدران ديرتك .. ألم تتعلم في ديرة "جمال عبد الناصر"؟؟ .. لاينكر الفضل إلا كل لئيم .. لاتهاجم الناس وانقد ما تراه بإسلوب حسن ........
أنا عشت ما يقرب من الخمسة وعشرون عاما في الكويت .. السنه يكرهونك والشيعه أيضا .. ولست أنت بليبرالي ، ولا علماني .. ولكنك نسواني .. معاهم معاهم ..عليهم عليهم ....
وما بالك و"حسن نصر الله" ..إنه لرجل محترم ينفذ ما يقول ويفعل .. احترس من عواقب الذلل لأنك خلاص ترهلت وكبرت وخرفت .. أرجو أن تصل إليك رسالتي.....

مواعظ مفيده

قال مالك بن أنس "رضي الله عنه" : بلغني أن ملكا من ملوك بني اسرائيل ركب يوما في زي عظيم وموكب هائل ولم يترك شيئا من سنن الملوك الأقدمين حتي فعله فهال ذلك الجند والناس فمر برجل يعمل شيئا مكبا عليه ولم يلتفت الي جهة الملك فوقف الملك عليه وقال له : أري كل الناس ينظرون الا أنت ؟ فقال الرجل : أيها الملك اني رأيت ملكا مثلك وكان علي هذه المدينه مات هو ومسكين في يوم واحد فدفن الي جنبه فكنت أعرفهما بشخصيهما ثم أعرفهما بقبريهما ثم جاءت ريح عاصفة فنسفت قبريهما وكشفت عنهما وخلطت بين عظاميهما فلم أعرف الملك من المسكين ، فلذلك أقبلت علي عملي وتركت النظر اليك , قال فتضاءل له الملك وانصرف وتركه في حاله ، فسبحان مفني الأمم ومعيد الرمم سبحانه وتعالي جل ذكره .

___________________________________

يقال أن الرشيد قال للسماك . عظني وكانت بيده شربة من ماء . فقال : ياأمير المؤمنين أرأيت لو حبست عنك هذه الشربه أكنت تفديها بملكك ؟
قال نعم .قال : ياأميرالمؤمنين فلوحبس عنك خروجها أكنت تفديها بملكك ؟ قال نعم . قال : لاخير في ملك لا يساوي شربة ماء ولا بولة ، فبكي الرشيد عند ذلك

____________________________________

وقال علي كرم الله وجهه لأسقف قد أسلم : عظني . قال : ياأمير المؤمنين ان كان الله عليك فمن ترجو . قال : أحسنت فزدني . قال : ان كان الله معك فمن تخاف . قال : أحسنت فزدني .قال : هب أن الله غفر ذنوب المسيئين أليس قد فاتهم ثواب المحسنين ؟ قال : حسبي حسبي ، وبكي علي أربعين صباحا ..